തൊഴില് വിസയ്ക്ക് വിരലടയാളം നിര്ബന്ധമാക്കിയ നടപടി സൗദി അറേബ്യ 10 ദിവസത്തേക്ക് മരവിപ്പിച്ചു
തൊഴില് വിസയക്ക് ബയോമെട്രിക് നിര്ബന്ധമാക്കുന്നത് മുംബൈ സൗദി കോണ്സുലേറ്റ് 10 ദിവസത്തേക്ക് കൂടിയാണ് നീട്ടിയത്. ഇന്നലെ ജനുവരി 15 മുതല് വ്യവസ്ഥ പ്രാബല്യത്തില് വന്നതിനു പിന്നാലെ ജനുവരി 26 വരെ മരവിപ്പിച്ച് പുതിയ ഉത്തരവിറക്കുകയായിരുന്നു. 2022 മെയ് 29 മുതല് നടപ്പാക്കാന് തീരുമാനിച്ചത് വിഎഫ്എസ് സെന്ററുകളുടെ എണ്ണക്കുറവ് കൂടി കണക്കിലെടുത്ത് റദ്ദാക്കിയിരുന്നു.
മുംബൈ: തൊഴില് വിസ ലഭിക്കാന് ഇന്ത്യയില് വച്ച് തന്നെ വിരലടയാളം നല്കണമെന്ന തീരുമാനം നടപ്പാക്കുന്നത് സൗദി അറേബ്യ വീണ്ടും നീട്ടി. സൗദി അറേബ്യയിലേക്കുള്ള തൊഴില് വിസ സ്റ്റാമ്പിങിന് ബയോമെട്രിക് നിര്ബന്ധമാക്കിയ ഉത്തരവ് ഇന്നലെ ജനുവരി 15 മുതല് പ്രാബല്യത്തില് വന്നെങ്കിലും 10 ദിവസത്തേക്ക് കൂടി നീട്ടുകയായിരുന്നു. മുംബൈയിലെ സൗദി കോണ്സുലേറ്റ് എല്ലാ ട്രാവല് ഏജന്റുമാരെയും ഇക്കാര്യം അറിയിച്ചു.
2022 മെയ് 29 മുതല് പുതിയ വ്യവസ്ഥ നടപ്പാക്കാനായിരുന്നു ആദ്യം കോണ്സുലേറ്റിന്റെ സര്ക്കുലര്. വിഎഫ്എസ് ഓഫീസുകള് ആവശ്യത്തിന് രാജ്യത്ത് ഇല്ലാത്തതിനാല് നിയമം നടപ്പാക്കുന്നത് വിസ നടപടികള്ക്ക് കാലതാമസമുണ്ടാക്കുമെന്ന് ട്രാവല് ഏജന്സികള് ചൂണ്ടിക്കാട്ടിയതിനെ തുടര്ന്ന് ഉത്തരവ് മരവിപ്പിക്കുകയായിരുന്നു. തീരുമാനം നടപ്പിലാവാന് മണിക്കൂറുകള് ശേഷിക്കെ ആയിരുന്നു ഇത്.
ജനുവരി 15 മുതല് നടപ്പാക്കുമെന്ന് അറിയിച്ച് കഴിഞ്ഞയാഴ്ചയാണ് പുതിയ സര്ക്കുലര് ട്രാവല്സുകള്ക്ക് ലഭിച്ചത്. ഈ സര്ക്കുലറാണ് 10 ദിവസത്തേക്ക് കൂടി മരവിപ്പിച്ചത്. നാളെ മുതല് ഈ മാസം 26 വരെ വിസ സ്റ്റാമ്പ് ചെയ്യുന്നതിന് കോണ്സുലേറ്റില് പാസ്പോര്ട്ടുകള് സ്വീകരിക്കും. എന്നാല് 26ന് ശേഷം വിരലടയാളം നിര്ബന്ധമാണെന്നും കോണ്സുലേറ്റ് അറിയിച്ചു. വിഎഫ്എസ് ഓഫീസില് നേരിട്ടെത്തി ബയോമെട്രിക് വിവരങ്ങള് നല്കേണ്ടിവരും.
